الكمية تكفي:12 شخصا

وقت التحضير:20 دقيقة

وقت الطهي:45 دقيقة


المقادير:كوب تمر منزوع النوى
نصف كوب زيت
نصف كوب حليب
كوب سكر
كوب دقيق
ملعقة صغيره بيكربونات الصوديوم ( كربوناتو)
ملعقة صغيره بيكنج بودر
3 بيضات
فانيليا
علبة قشطه
ملعقه كبيره زبده
نص ملعقة قرفه او حبهان مطحون (اختياري) بعشق الحبهان

التحضير:اول حاجه هنحط التمر مع الحليب على النار لحد ما التمر يدوب ويبقى شبه العجينه كده
بس ماتهرسيش قوي عشان عاوزين فيه قطع تمر
بعد ما يهدى دقيقه كده نحط عليه البيكربونات هنلاحظ انه بيفور وينفش
والكربونات لازمتها انها تفتح مسام التمر عشان هو تقيل وممكن يتقل العجينه وتبقى ماسكه في بعض ومش هشه
هنسيبه على جنب, وبعدين نروح نضرب في الخلاط البيض مع الفانيليا
وربع كوباية سكر من مقدار السكر لحد ما البيض لونه يفتح
هنضيف الزيت ونضرب تاني وبعدين نصبه على الدقيق المخلوط بالبيكنج بودر
ونقلب بالملعقه وبعدين نضيف التمر اللي دوبناه ونقلب كويس في اتجاه واحد
هنصب الخليط في صينيه متوسطه ومدهونه وكالعاده بحب استخدم الصواني اللي بتتفتح .. شايفين قطع التمر
هندخلها فرن حامي من نص ساعه ل ساعه الا تلت ونسيبها جوا 5 دقايق بعد مانطفي عليها
وبعدين نطلعها نصب عليها صوص الكراميل وطريقته برضه سهله جدا
صوص الكراميل:
باقي السكر بتاعنا كوبايه الا ربع + ربع كوب ماء + علبة قشطه + ملعقة زبده كبيره
هنحط السكر والميه عالنار بدون تقليب ونسيبها لحد ما تحمر وتعمل لون الكراميل الجميل
هنوطي النار خالص وننزل بالقشطه بس ماتكونش بارده ونخلي بالنا عشان بتطرطش
ونقلب كويس وبعدين نحط ملعقة الزبده ونشيل الكراميل شكله هيكون كده
هناخد كام معلقه من الصوص ونفردهم عالوش والاجناب ونشيل الباقي في برطمان هينفعنا في حلويات تانيه
بيبقى خطير على الايس كريم وعلى السينابون و تارت التفاح وعلى اي كيكه او بسكويت او معجنات حلوه