كل سنة وانتم طيبين وبجد انا سعيد انى هكمل معاكم المحاضرات
النهاردة ان شاء الله هبدأ اولى محاضراتنا السنة دى فى رمضان وهبدأ سلسلة فى القرأن
رمضان دا هتكلم فيه عن قصص القرأن هتكلم عن القصص الموجودة فيه وهبدأ بحديث النبى عليه الصلاة والسلام :
ان حول العرش منابر من نور عليها قوم لباسهم من نور ووجوههم نور ليسوا بأنبياء ولا شهداء
يغبطهم الأنبياء والشهداء قالوا : صفهم لنا يا رسول الله
فقال النبى عليه الصلاة والسلام هم قوم اجتمعوا على محبة الله وطاعة الله على غير أنساب بينهم
( يعنى سيدنا محمد بيتكلم علينا يا جماعة )
وانا هتكلم النهاردة عن اهمية دراسة قصص القرأن :
وانا عايز اقولكم ايه سر تشريف رمضان ، سر تشريف رمضان ان القران نزل فيه
تقول الأية : ( شهر رمضان الذى انزل فيه القرأن ) صدق الله العظيم
عشان كدا هوا دا الشهر الوحيد اللى ذكر فى القرأن وتشرف رمضان بنزول القران فيه ، وغير كدا ايه هيا معجزة الإسلام وسيدنا محمد عليه الصلاة والسلام - المعجزة هيا القران
طب ايه المعجزة فى كدا ؟
المعجزة فى كدا ان لو مشيت على كل حاجة موجودة فى القران ونفذت كل حاجة فيه اصبح من عظماء الإسلام ومن انجح الناس فى الدنيا فعظمة القران فى كدا
عشان كدا موضوعنا المرة دى ان احنا هنعيش مع قصص القران عشان نحس بالقران ونحبه
وانا هدفى ان احنا نحب القرأن وقصصه زى ما حبينا سيرة النبى عليه الصلاة والسلام
ونفهم القران نعيش بالقرأن ونتخلق بأخلاق القرأن ، فالقرأن هوا رسالة ربنا للبشرية
وهوا كلام الله الرسالة الخاتمة للبشرية
والصحابة يا جماعة لما كانوا بيسمعوا القران كانوا متأثرين بيه فلما يسمعوا الأية تقول :
( يأيها الذين آمنوا ...... ) فينصتوا جيدا للكلام عارفين ان فى رسالة ربنا هيقولها ليهم
والقرأن يا جماعة اللى ربنا سماه ( هدى - شفاء – رحمة - نور - حق – هداية )
يقول الله عزو جل
إِنَّ هَذَا الْقُرْآَنَ يَهْدِي لِلَّتِي هِيَ أَقْوَمُ وَيُبَشِّرُ الْمُؤْمِنِينَ الَّذِينَ يَعْمَلُونَ الصَّالِحَاتِ أَنَّ لَهُمْ أَجْرًا كَبِيرًا (9)
وايه تانى :
وَنُنَزِّلُ مِنَ الْقُرْآَنِ مَا هُوَ شِفَاءٌ وَرَحْمَةٌ لِلْمُؤْمِنِينَ وَلَا يَزِيدُ الظَّالِمِينَ إِلَّا خَسَارًا (82)
ويقول الصحابة
كنا نعرف قارئ القران من النور فى وجهه وعلى لسانه
وايه تانى :
اقدر أقول ان القرآن بيعطى روح جديدة تدخل على روحك فترفع منه وتسمو به إلى اعلى الدرجات
يقول الله عزو جل :
وَكَذَلِكَ أَوْحَيْنَا إِلَيْكَ رُوحًا مِنْ أَمْرِنَا مَا كُنْتَ تَدْرِي مَا الْكِتَابُ وَلَا الْإِيمَانُ وَلَكِنْ جَعَلْنَاهُ نُورًا نَهْدِي بِهِ مَنْ نَشَاءُ مِنْ عِبَادِنَا وَإِنَّكَ لَتَهْدِي إِلَى صِرَاطٍ مُسْتَقِيمٍ (52)
فلو عايزين تقووا روحكم فوق الروح اللى عندكم اقرأوا القرأن
القران يا جماعة حول امة كانت بترعى الغنم لأمة بترعى الأمم فى 23 سنة
تقول الأية :
وَلَوْ أَنَّ قُرْآَنًا سُيِّرَتْ بهِ الْجِبَالُ أَوْ قُطِّعَتْ بهِ الْأَرْضُ أَوْ كُلِّمَ بهِ الْمَوْتَى بَلْ لِلَّهِ الْأَمْرُ جَمِيعًا أَفَلَمْ يَيْئَسِ الَّذِينَ آَمَنُوا أَنْ لَوْ يَشَاءُ اللَّهُ لَهَدَى النَّاسَ جَمِيعًا وَلَا يَزَالُ الَّذِينَ كَفَرُوا تُصِيبُهُمْ بمَا صَنَعُوا قَارِعَةٌ أَوْ تَحُلُّ قَرِيبًا مِنْ دَارِهِمْ حَتَّى يَأْتِيَ وَعْدُ اللَّهِ إِنَّ اللَّهَ لَا يُخْلِفُ الْمِيعَادَ (31)
سبحان الله
عشان كدا كل انتصارات الأمة كانت فى رمضان عشان كانوا بيقرأوا قرأن
( موقعة بدر - حطين - فتح الاندلس - حرب 6 أكتوبر )
كل دا كان فى رمضان شهر القران
خدوا بالكم المصحف دا يصلح حياتكم كلها وهنشوف فى القصص
تقول الأية
لَقَدْ أَنْزَلْنَا إِلَيْكُمْ كِتَابًا فِيهِ ذِكْرُكُمْ أَفَلَا تَعْقِلُونَ (10)
يعنى ايه فيه ذكركم :
يعنى فيه مستقبلكم وشرفكم ونهضتكم وعزتكم
كان فى واحد صحابى اسمه الأحنف بن قيس كان كل يوم يفتح المصحف الصبح ويقرأ منه ويقول : ماذا يقول لى ربى
فيفتح القرأن عشوائى ويشوف ربنا بيقوله ايه
شايفين يا جماعة عايش مع القران ازاىبكل شدة وقوة
هقولكم على حاجة تفرق معاكم كتير :
( البحر معجزة - والسماء معجزة - والأرض معجزة - والقران برضه معجزة لا تقل عنهم )
وكل ما ربنا ييجى يتكلم عن حاجة فى الكون يتكلم عن القرأن عشان يقولنا ان القران برضه بنفس القوة
طب ازاى :
يقول الله عزو جل :
( تبارك الذى بيده الملك وهو على كل شئ قدير )
ويقول الله ايضا
( تبارك الذى نزل الفرقان على عبده ليكون للعالمين نذيرا )
صدق الله العظيم
فالقران يدخل على الجينات بتاعتك ، فيدخل على عينك وعلى لسانك وعلى قلبك ، ويدخل على ارادتك وروحك يصلح ويكبر ويحسن حياتك
ياريت نكون يا جماعة زى سيدنا محمد عليه الصلاة والسلام ويكون خلقنا القرأن
ياريت ندور على الاخلاق فى المصحف اللى موجودة ونخلى اخلاقنا زى اخلاق النبى عليه الصلاة والسلام
يقول النبى عليه الصلاة والسلام :
( من قرأ حرفا من كتاب الله فله به حسنة والحسنة بعشر امثالها لا اقول الم حرف
ولكن اقول الف حرف ولام حرف وميم حرف )
يقال لقارئ القران يوم القيامة :اقرا وارتقى ورتل فإن منزلتك عند أخر اية تقرأها
ويقول النبى عليه الصلاة والسلام :
( أهل القرأن اهل الله وخاصته )
طب احنا بقى عايزين نتفق على حاجة مع القران :
نحبه - نفهمه – نطبقه - نعيش بيه - ونصلح حياتنا بيه وبعلاقتنا مع اسرتنا
طب كل دا ازاى :
سنحيا بالقران اخترت اعملها من قصص القران طب هعملها ازاى
طب اشمعنى قصص القران اللى اخترته :
لأن قصص القران بيعلمنا 4 حاجات :
1 – ازاى تحب وتفهم القران
2- ازاى تصلح حياتك واخلاقك وتنجح فى حياتك انت واسرتك بالقرأن
3 - وكمان يعلمك ازاى تتعلق بأسماء الله الحسنى وتحب ربنا
4 – ازاى تحيا الامة وتقوم على رجليها وتنهض
فى ناس كتير بتقرأ القران ومش بتفهمه مع ان ثلث القرأن يتفهم لوحده
طب يعنى ايه قصص القران :
يعنى قصة او حدوتة والنفس البشرية فى طبيعتها بتحب القصص من واحنا صغيرين نعشق القصص ونعشق سماع الحواديت وربنا سبحانه وتعالى خلى ثلث القرأن قصص جميلة مؤثرة درامية تلمس لحظات حياتك ، فكل قصة بتلمس حاجة جواك وكل دا هنشوفه لما نبدأ فى القصص فتؤثر القصة فينا فتكون النتيجة انك فهمت القصة فتحب السورة فتحفظها فتحب القران فتفهم القران ، وهو دا هدفى من قصص القرأن
طب انا بقى هعمل ايه ؟
هقعد طول المحاضرة اشرح القصة فنبدأ نفهم القصة ونعرف ربنا يقصد إيه بأياته فنفهم السورة
وبعد ما نخلص القصة نمسك الأيات ونقرأها ونبدأ نسمع ربنا بيقول ايه فى السورة دى
فالنفس البشرية عندها فضول فنحب القرأن ونجتهد فى الباقى فنفهمه كله والقرأن سبحان الله من اوله لأخره قصص وكمان فى اسماء للسور باسم القصص ( زى سورة الكهف -
وقصة أل عمران - وسورة مريم - وسورة الفيل ، وغيرها )
دا كان اول حاجة
2- هنصلح حياتنا بالقرأن طب ازاى ؟
أصل القصص اللى هحكيها مش قصص الأنبياء لكن قصص أخرى قصص الناس العادية اللى ذكرت بالقران زى مين مثلا ( زى اهل الكهف - طالوت وجالوت - أصحاب الجنة )
كل دا هحكيه ان شاء الله
لكن فى حياة البشر بلايين القصص حتى كل اللى بيسمعونى ومتابعينى دلوقتى عندهم الكثير من القصص فى حياتهم ، لكن الله عزو جل اختار 30 قصة فى القرأن ، فالقصص دى مرايات لكل واحد فينا ، كل واحد هيشوف نفسه فى القصة اللى هحكيها
عشان كدا فى ابطال فى القصص مش كويسين زى ( قارون - اصحاب الجنة والاولاد اللى خانوا ابوهم بعد ما مات فكانت نهايتهم ايه هنعرف لما نجيلهم - وقصة قابيل وهابيل )
صحيح هى قصص قديمة ممكن تشوف فيها نفسك وانا بتكلم فيحصلك ايه تبقى مش عايز تكون زى الناس دى وحياتنا فى الوقت دا متلخبطة ومش عارفين الصح من الغلط فمفيش قدامنا غير انا احنا نتمسك بالقرأن
اديكم امثلة تشويقية مثلا واقولكم زى ايه ؟
انت تعرف نفسك ولا لأ ، انت اى نفس خلى بالكم مرض النفس أشد من مرض الجسم
مرض الجسد مش يدخلك النار ، لكن مرض النفس يدخل نار العياذ بالله من مرض النفس
( انت نفس مطمئة - ولا انت نفس مؤمنة - ولا انت نفس لوامة - ولا انت نفس امارة بالسوء
لو فيك حاجة من دول اسمع قصة قابيل وهابيل ، وانت تشوف النفس البشرية عاملة ازاى )
طب ايه تانى :
هنشوف برضه فى القصص ( قصة الولاد اللى خانوا ابوهم بعد ما ماتوا وحصلهم ايه هقولكم فى القصة ودا فى قصة اصحاب الجنة )
طب ايه تانى
يا ترى مبادئك اتغيرت بعد ما كبرت ولا انت زى مانتا ، فى ناس يا جماعة بتبيع رصيد الأخلاق عشان تملى رصيد البنك طب دا موجود فين ( فى قصة قارون )
طب ايه تانى :
هنشوفه فى القصص قصة ازاى تواجه الظلم من غير عنف
قصة غلام عنده 14 - 15 سنة ، وقف قدام الملك الظالم وانتصر عليه من غير نقطة دم واحدة
ودا فى قصة ( اصحاب الأخدود )
طب ايه تانى
فى قصص عائلية ( قصة جد وجدة قرروا يعملوا عيلة متماسكة مين هما قصة آل عمران )
طب ايه تانى :
قصة تانية لعيلة حصلها مأساة واتفرقت وهيا بترتب لترتيبات الفرح فالأخ قتل اخوه كل دا فى قصة ( قابيل وهابيل )
طب ايه تانى :
قصة البنات اللى عندهم عاطفة حب ومش عارفين يودوا الحب دا فين والعاطفة اللى جواهم ويوجهوها صح ( قصة السيدة مريم )
كل دا هشرحه فى قصص القران ان شاء الله من اول بكرا
3 - بنتعلم من القران ايه ازاى قلوبنا تتعلق بأسماء الله الحسنى :
لما نشوف ربنا ازاى وقف جنب 7 شباب وغيرلهم نواميس الكون كل دا فى قصة اهل الكهف
4 - ازاى تحيا الامة هنعرفها منين :
( فى قصة عزير - وقصة ذو القرنين اللى قعد يصلح فى الدنيا كلها من شرقها لغربها لكن عمره ما ظلم ولا سرق ثروات الشعوب مع أنه كان قوة عالمية ورفض يأخذ مليم من البلاد اللى دخلها ولف على 5 امم )
دى كانت مقدمة عن قصص القران وعن القصص اللى هشرحها وفى اكتر من كدا ، وهنعيش كل يوم مع قصة نتعلم منها ونعرف القرأن اكتر ان شاء الله ، ونتعلم منه اكتر ونطبق القران فى حياتنا
وكلنا ان شاء الله سنحيا بالقران فى رمضان وبعد رمضان ان شاء الله
وهنبدأ بكرا ان شاء الله فى اول قصة ومن اجمل القصص وفيها معانى جميلة
وهى قصة ( قابيل وهابيل ) وبداية الخلق وبداية الكون هيحصل فيها ايه دا هقولكم عليه بكرا ان شاء الله
انا خلصت النهاردة اشوفكم بكرا على خير ان شاء الله
- Digg
- Delicious
- StumbleUpon
- Facebook